काठमाडौं । जापानका पूर्वप्रधानमन्त्री शिन्जो आबेको हत्यामा धार्मिक नेता र धार्मिक संगठनको सम्बन्ध पनि बाहिर आएको छ । हत्या अभियुक्तले प्रहरी सोधपुछका क्रममा आफूले शिन्जो आबेको नभई एक धार्मिक नेताको हत्या गर्न चाहेको स्वीकार गरेका छन् । उनले धार्मिक नेतालाई मार्न नसकेको तर शिन्जो आबे ती धार्मिक नेतासँग सम्बन्धित भएकाले मारेको बताएका छन् ।
ब्लूमबर्गले रिपोर्ट गरेअनुसार शिन्जो आबेको हत्याले एक राजनीतिक पार्टीप्रति धेरैको ध्यानाकर्षण गरायो जसले भर्खरको चुनाव अघि शिन्जो आबेलाई धार्मिक संगठनसँगको सम्बन्धको लागि आलोचना गरेको थियो। वास्तवमा, एनएचके पार्टीका महासचिव अकिहिको कुरोकावाका केही भनाइहरू सामाजिक सञ्जाल प्रयोगकर्ताहरूले उद्धृत गरेका थिए, जसमा शिन्जो आबेलाई गत महिना एक अभियान बहसको क्रममा जापानमा धार्मिक संस्थाहरूलाई दिइएको कोषको लागि दोषारोपण गरिएको थियो। कथित रूपमा यी संगठनहरूलाई विदेशी जासुसीको आरोप लगाइएको थियो।
आबेको हत्याका अभियुक्त तेत्सुया यामागामीले प्रहरीलाई बताएअनुसार उनले सुरुमा एक धार्मिक समूहका नेतालाई आक्रमण गर्ने योजना बनाएका थिए । उनलाई आफ्नी आमाले यिनै धार्मिक नेतालाई ठूलो रकम दान दिएपछि आमा टाट पल्टिएको भन्ने लागेको थियो । रिपोर्टमा भनिएको छ कि उनले आबे विरुद्ध पनि पूर्व प्रधानमन्त्रीले जापानमा धार्मिक समूहलाई बढावा दिएको भन्दै उजुरी गरेका थिए ।
अर्कोतर्फ जापानका पूर्वप्रधानमन्त्री सिन्जो आबेको हत्या हातले बनाएको बन्दुकले भएको अनुसन्धानबाट खुलेको छ । अभियुक्तले सिन्जो आबेको हत्यामा प्रयोग भएको बन्दुकका पार्टपुर्जा अनलाइनबाट किनेका थिए र शुक्रबार हातले बनाएको बन्दुकले हत्या गरेका थिए ।
पूर्वप्रधानमन्त्री शिन्जो आबेको हत्यामा अभियुक्तले प्रयोग गरेको बन्दुक सजिलै बनाउन सकिने हतियार विज्ञहरू बताउँछन् । यस्ता बन्दुक बनाउने पार्टपुर्जा पसल वा अनलाइनमा सजिलै उपलब्ध हुने विज्ञहरुले बताएका छन् ।
विज्ञहरूका अनुसार अभियुक्त ४१ वर्षीय तेत्सुया यामागामीले प्रयोग गरेको डबल ब्यारेल बन्दुकको बारेमा पक्कै पनि थोरै थाहा छ, तर प्रारम्भिक निरीक्षणले यो बन्दुक सजिलैसँग जम्मा गर्न सकिने पार्टपुर्जाहरूबाट बनेको देखिन्छ जुन पार्टपुर्जा हार्डवेयर पसलमा पाइन्छन् ।
बन्दुक हेर्दा त्यसलाई बनाउन काठको फ्रेम, पाइप, बिजुलीको तार जोड्न प्रयोग हुने टेप, ब्याट्री आदि प्रयोग गरिएको विज्ञले बताएका छन् । यी सबै पार्टपुर्जा मिलाएर बन्दुक कसरी बनाउने सकिन्छ भन्ने जानकारी पनि अनलाइनमा उपलब्ध रहेको विज्ञहरूले बताए ।
यता, प्रहरीले अभियुक्तको घरमा खोजीका क्रममा हातले बनाएको अन्य केही बन्दुक भेटिएको पनि जनाएको छ । खोजीका क्रममा अभियुक्तले केही समयदेखि हतियारको डिजाइन र परिक्षण गरिरहेको समेत खुलेको छ ।
आरोपीको साथबाट बरामद गरेको डबल ब्यारेल बन्दुक ४० बाइ २० सेन्टिमिटरको रहेको प्रहरीले जनाएको छ । जबकि, युकेमा आधारित साना हतियार विशेषज्ञ म्याथ्यू मोसले भने कि अभियुक्तले डबल ब्यारेल बन्दुक बनाएको कारण यो झोलामा लुकाउन पनि सजिलो थियो।
मोसले भने कि आरोपी यामागामीले २००२ र २००५ को बीचमा पूर्ण तीन वर्ष आत्म-रक्षा बलमा सेवा गरेका थिए। त्यस समयमा अभियुक्तले प्रत्यक्ष फायर एक्सरसाइजमा भाग लिएका थिए, जसको अर्थ उसले हतियार चलाउने तालिम लिएका थिए। हत्यामा प्रयोग भएको बन्दुक कसरी बनाउने भन्ने विषयमा अभियुक्तले तालिम लिनुपर्ने अवस्था नरहेको उनले बताए ।