गायक अर्जुन सापकोटाले बिहेपछी सार्वजनिक गरेको पहिलो गित ‘दुख साटम्ला सुख साटम्ला’ यत्तिबेला युट्युव ट्रेन्डिङको शिर्ष स्थानमा छ । गीतको म्युजिक भिडियोमा सापकोटाको दिपा सिम्खडासँगको विवाह समारोहको फुटेज प्रस्तुत गरिएको छ, जसले प्रेमको यो उत्सवमा व्यक्तिगत स्पर्श थपेको छ । जुन प्रेम विवाहमा परिणत भएको जोडीलाई समर्पित गरिएको छ ।
३ दिन अघि सार्वजनिक गितले निकै लोकप्रियता हासिल गरेको छ, यतिबेला गितलाई झन्डै ८ लाख दर्शकहरुले मन पराई सकेका छन् ।
नयाँ गित सार्वजनिक भएसगै सापकोटाले सामाजिक संन्जालमा लेखेका छन्, “हामी सबै मायालु दम्पतीहरूलाई उनीहरूको प्रेममा सफलताको कामना गर्दछौं। हामी हाम्रो जीवनको सबैभन्दा महत्त्वपूर्ण क्षणको खुशी तपाईंहरू सबैसँग बाँड्न चाहन्छौं, र हामी आशा गर्दछौं कि तपाईंको माया र आशीर्वाद हामीमा जारी रहनेछ।”
गीतमा अर्जुन सापकोटा, देवी घर्ती र समीक्षा अधिकारीको स्वर रहेको छ । सन्तोष सापकोटाको शब्द रहेको गीतमा अर्जुन सापकोटाको संगीत रहेको छ । निर्माण टोलीमा संगीत संयोजन, मिक्सिङ र मास्टरिङका लागि एचबीएन किस्मत छन् भने राज र आकाशले रेकर्डिस्टको रूपमा काम गरेका छन्।
सारंगीमा हेमन्त कान्छा रसाइली, बाँसुरीमा गोपाल देव र मादलमा मदन रेग्मीको वाद्य सहयोग रहेको छ भने पञ्चे बाजामा एचबीएन किस्मत रहेका छन्। गित अर्जुन सापकोटा अफिसियल युट्युबबाट सार्वजनिक गरिएको हो ।