“होली ” को दिन आज
रंगको दिन आज !
रुमानी यादहरू कल्पनाभरि
म यसै हराउँछु अनायासै …
रंगै रंगको वर्षा हुन थाल्छ मनभरि ,
हावामा रंग छ ,
आकाश रंगीन छ ,
मन रंगीन छ …
एक पिचकारी रंग लिन्छु म
तिमी हाँस्दै भागे झैँ गर्छ्यौ
म पछि पछि दौडे झैँ गर्छु
तिमी थाके झैँ गर्छ्यौ ,
म मुश्किलले समाएँ झैँ,
नजिक पुग्ने गर्छु
म तिम्रो हँसिलो अनुहारभरि
पिचकारी भरिको रंग छर्कीदिन्छु
तिम्रो तनभरि रंगले भिजाईदिन्छु !
रंग पोखिन्छ तिमीभरि ,
छिन भर मै ,
तिमी बिहानीको उषा हुन्छ्यौ
साँझको गोधुली र घाम पानी भित्रकी
इन्द्रेणी हुन्छ्यौ ,
तिमी लाजले पानी पानी हुन्छ्यौ …!!
तिमी पो के कम र !
खोइ कहाँ लुकाएकी थियौ
त्यति धेरै रंग !
सबै म भरि खन्याई दिन्छ्यौ
बिहानीपखको ओलांगचुन्गा शिखर बन्छु ,
राताम्मे ,
पूर्णिमाको रातमा जूनले चुमेको सगरमाथा बन्छु
अनायासै …
हामी रंगीन हुन्छौ , पूर्ण रंगीन !
रुख , चराहरू , फूलहरू र आकाश
हाम्रा रहरहरू , चाहनाहरू र समुन्द्र
हाम्रा रहरहरू , पुतली र सारा धर्ती
सबै रंगीन भै दिन्छ हाम्रा सपना सँगसँगै
एकाएक !
सबै दुनियाँ रंगको गोला देखिन्छ …
यथार्थमा …
रेल दौडेको छ , जिन्दगी दौडे झैँ
कहीँ अँध्यारा टनेलहरू , कहीँ पतझड जंगलहरू
कहीँ उकाली जस्तो , कहीँ ओराली कस्तो !
रेलको झ्यालबाट हेर्दा यस्तो लाग्छ
दृश्यहरू परिवर्तन हुँदै छन् जिन्दगी झैँ छिटो रफ्तारमा !
हो ! म सोच्छु
जिन्दगीको अलिकति रंग उडेकै हो ,
फुंग भएर !
नियास्रो देखिएकै हो ,
ब्ल्याक एण्ड ह्वाईट भएर !
हिउँ पग्लिने आशा बसेका छन् चिसा सडकहरू
वसन्तको पर्खाइमा छन् देवदारुका रुखहरू ,
गन्तव्यको खोजीमा लम्केका छन् पाइलाहरू
म हिँड्दै छु ……..हिँड्दै छु …….
मेरो रंगीन भविष्यको खोजीमा !
मेरो रंगीन ” होली ” को खोजीमा …
एभरेष्ट सूर्य बोहरा
हाल ,काठमाण्डौं
प्रकाशित मिति, २०७४ साल, फाल्गुण १५ गते, सोमबार
