विराटनगर । आर्थिक अवस्था कमजोर भएका कारण नोबेलले उपचार गर्न नमाने पछि घर पुगेर संक्रमित महिलाले आत्महत्या गरेकी छिन् । अस्पतालले उपचार नगरी घर फर्काएपछी मोरङको रतुवामाई नगरपालिका–१० की ४० वर्षीय नरमाया मगरले आत्महत्या गरेकी हुन् ।
नोबेलमा कात्तिक ९ गते कोरोना पोजेटिभ देखिएपछि अस्पतालले उपचारमा दैनिक १८ हजार रुपैयाँ लाग्ने भन्दै अग्रिम भुक्तानी गर्न दबाब दिएको थियो । महङ्गो उपचार शुल्क तिर्न नसक्ने परिवारले बताएपछि नोबेलले घर जान भनेको थियो ।
सरकारी अस्पतालमा बेड नभएको र पैसाबिना नोबेलमा उपचार नपाएपछि श्रीमान टेकबहादुर मगरले उनलाई घर फर्काएकोमा १० गते उनले शौचालयमा पासो लागेर आत्महत्या गरेकि हुन् । रतुवामाई नगरपालिका–१० का अध्यक्ष टंक ढकालका अनुसार मृगौलाले काम गर्न छाडेपछि मृतकको गत असारदेखि डाइलसिस हुँदै आएको थियो ।
मगरको कात्तिक ९ गते विहान करिब ३ बजे नोबेलमै डाइलसिस भएको थियो । डाइलसिस गरेको केही समयपछि कोरोना पोजेटिभ रिपोर्ट आएको भन्दै नोबेलले आइसोलेसनमा भर्ना भएर दैनिक १८ हजार रुपैयाँ खर्च गरे मात्र उपचार हुने बताएको थियो ।
अस्पतालले दैनिक १८ हजार तिनुपर्छ भनेपछि श्रीमतीलाई आइसोलेसनमा भर्ना गर्ने आट नै नाअएको श्रीमान टेकबहादुर मगरले बताए । महँगो शुल्क तिर्न नसक्ने भएपछि श्रीमतीलाई घर ल्याएकोमा टिकाको दिन उनले आत्महत्या गरेको उनको भनाई छ ।
वडा अध्यक्ष ढकालका अनुसार मृतकको परिवार आर्थिक रुपमा विपन्न छ । कोरोना पोजेटिभ देखिएपछि घर आएकी उनलाई घरसँगै रहेको गोठमा बस्ने व्यवस्था मिलाइएकोमा गोठमै बनाएको अस्थायी शौचालयमा झुण्डिएको अवस्थामा मृत भेटिएको हो ।
नोबेलले भने संक्रमितलाई पैसा नभएकै कारण घर नपठाएको दावी गरेको छ । कलेजका प्रबन्धक नारायण दाहालले संक्रमितलाई घर नपठाएको दावी समेत गरे । ‘हामीले बिरामीलाई घर पठायो भन्ने आरोप गलत हो,’ उनले भने, ‘हामीले उपचार गरिरहेका छौं, कसैलाई घर पठाएका छैनौं ।
यसअघि पनि उपचारमा लापरबाही गर्दै आएको नोबेलकै कारण कतिपयले अकालमा ज्यान गुमाएका छन् । तर, नोबेलमाथि कुनै कार्बाही भएको छैन ।