अन्ततः जनताको बिरोधका बीच प्रतिनिधिसभाबाट अमेरिकी सहयोग परियोजना मिलेनियम च्यालेन्ज कर्पोरेशन एमसीसी पारित भएको छ । जनताले चुनेर पठाएका प्रतिनिधिहरुले नै जनताको आवाजलाई लत्याउँदै एमसीसी पास गरेका हुन् । हिजो पक्ष बिपक्षमा उत्रिए पनि एमसीसी पास गर्ने बेलामा सबै नेता तथा राजनीतिक दल एकै ठाउँमा उभिए ।
एमसीसी जुनसुकै हालतमा पास गराउने उदेश्यका साथ लागि परेको अमेरिका पनि खुशी भएको छ । एमसीसी पास भए सँगै संयुक्त राज्य अमेरिकाले स्वागत गरेको छ । नेपालस्थित अमेरिकी दूतावासले एमसीसी पास भए लगत्तै आइतबार राति विज्ञप्ति जारी गर्दै नेपालको निर्णयको स्वागत गरेको हो । विज्ञप्तिमा एमसीसी अब कार्यान्वयनको दिशातर्फ अघि बढेको समेत बताइएको छ।
अमेरिकाले संसदको निर्णयसँगै नेपाली जनताका लागि थप रोजगारीको सिर्जना हुनुका साथै विद्युत् सेवाको आपूर्तिमा वृद्धि हुने पनि जिकिर गरेको छ । भए भरको शक्ति खन्याएको अमेरिकाले अझै स्वाँगिलो बन्दै एमसीसी अनुमोदन गर्ने या नगर्ने भन्ने निर्णय सार्वभौम लोकतान्त्रिक राष्ट्रका रूपमा सधैं नेपाल सरकारको हातमा थियो समेत भनेको छ ।
दूतावासले भनेको छ, ‘हस्ताक्षरित प्रतिबद्धतालाई पूरा गर्दै कम्प्याक्टलाई अनुमोदन गर्ने संसद्को निर्णयका कारण नेपाली जनताका लागि थप रोजगारीको सिर्जना हुनेछ, विद्युत् सेवाको आपूर्तिमा वृद्धि हुनुका साथै ढुवानी खर्च घट्नेछ ।’दुई देशबीचको सम्बन्ध एउटा सम्झौताभन्दा धेरै फराकिलो रहेको भन्दै दूतावासले नेपालको लोकतान्त्रिक मूल्यमान्यता तथा दीर्घकालीन आर्थिक समृद्धिलाई अमेरिकाले निरन्तर समर्थन गर्ने जनाएको छ ।