काठमाडौं । नेकपा (माओवादी केन्द्र) ले स्थानीय तहको निर्वाचनका लागि चुनावी कमाण्ड बनाउने भएको छ ।
दुई दिन चलेर सोमबार सकिएको केन्द्रीय समिति बैठकले सातै प्रदेश अन्तर्गत विभिन्न जिल्लाहरूलाई समेटेर विभिन्न कमाण्ड बनाउने भएको छ ।
एक केन्द्रीय सदस्यका अनुसार प्रदेश इन्चार्जले प्रदेशभित्रका पार्टी केन्द्रीय सदस्यहरुको बैठक राखेर ती प्रदेशभित्रका जिल्लाहरूलाई विभिन्न समूहमा विभाजन गरेर कमाण्ड बनाउनेछन् ।
ती कमाण्डले फेरि तल्लो तहसम्म गएर चुनावी गतिविधिलाई सशक्त बनाउने निर्णय मओवादीले गरेको छ। त्यसका लागि केन्द्रीय समिति बैठकले प्रदेश इन्चार्ज समेत तोकेको छ।
प्रदेश १ को इन्चार्ज राम कार्की तोकिएका छन् भने मधेस प्रदेशको इन्चार्ज गणेश साह बनेका छन् । त्यस्तै बागमतीमा हितमान शाक्य, गण्डकीमा हितराज पाण्डे, लुम्बिनीमा चक्रपाणि खनाल, कर्णालीमा कालीबहादुर मल्ल र सुदूरपश्चिममा खगराज भट्ट इन्चार्ज तोकिएका छन् ।
त्यस्तै सम्पर्क समन्वय प्रदेशमा डिलाराम आचार्य र उपत्यका विशेष समन्वय प्रदेशमा लिलामणि पोखरेलले इन्चार्जको भूमिका पाएका छन् ।