सिन्धुली। नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ले देश र जनताको रक्षाका लागि आफ्नै खुट्टामा उभिएर निर्वाचन जित्नुपर्ने बताएका छन्। आज सिन्धुलीमाढीमा माओवादी केन्द्र सिन्धुलीको भवन उद्घाटनपछि सम्बोधन गर्दै देश, जनता, संविधान र लोकतन्त्रको रक्षाका निम्ति आफूहरूले निर्वाचनमा विजयी हुनुपर्ने बताए।
यदि आफूहरूले हारे नेपाली जनता, नेपाल राष्ट्र र माओवादी केन्द्रलाई हानी हुने भएकाले जसरी पनि जित्नुपर्ने उनको तर्क छ। ‘खतरा अझै टरेको छैन, हामीले अझै जितेका छैनौं, प्रतिगमनकारीहरू माओवादी केन्द्रलाई सखाप पार्ने षड्यन्त्रमा रहेकाले घर-घरमा गएर जनतामाझ जोडिन आग्रह गर्दछु,’ उनले भने, ‘साथीहरू यो निर्वाचनलाई सानो नठान्नुहोला, हामीले हार्यौं भने संविधन र गणतन्त्र नै हार्नेछ, जनयुद्ध र शान्ति प्रक्रियाले नै हार्ने भएकाले यो निर्वाचन जसरी पनि हामीले जित्नैपर्छ।’ जनयुद्ध र जनआन्दोलनमा गाँस काटेर हामीलाई पाल्ने जनतामा जोड्ने गरी अभियान थाल्न निर्देशन दिए।
प्रचण्डले पार्टीका नेता तथा कार्यकर्तालाई आत्मसमीक्षासहित जनताको घरदैलोमा जान पनि निर्देशन दिए। उनले जनता बदलिएको नभइ माओवादी नेता तथा कार्यकर्ता बदलिनुका साथै बिग्रिएको बताए। ‘फेरी जनतासँग जोडिनुको विकल्प छैन। आफ्नौ खुट्टामा उभिने, अफ्नै तागतमा आउँदो निर्वाचन जित्ने संकल्प गर्नको लागि म तपाईँहरुलाई विशेष अपील पनि गर्न चाहान्छु,’ प्रचण्डले भने, ‘अहिले स्थिती बदलिएको छ। जनता बदलिएको होइन। हामी माओवादी नेता कार्यकर्ता बदलिएका छौं, बिग्रिएका छौं। दुई महिनामा चुनाव जितेर देखाउने संकल्प गरौं।’
एमालेले सत्य तर्कबिना संसद् चल्न नदिएको आरोप लगाउँदै अध्यक्ष प्रचण्डले अझै पनि अध्यक्ष प्रचण्डले ‘रिल्याक्स’ गर्ने अवस्था नआएको बताए। ‘समाजवादको यात्रामा जान जसलाई नायक बनाउन लागियो उनी नै खलनायक भए,’ उनले भने, ‘मुलुकमा गणतन्त्र विरोधीहरू अझै सक्रिया भएकाले सचेततापूर्वक अधि बढ्न आग्रह गरे। सिंहदरबारलाई गाउँ-गाउँमा पुर्याउन हामीले संविधान बनायौं।’ अध्यक्ष प्रचण्डले देशमा संघीय लोकतान्त्रिक गणतन्त्र ल्याउन हजारौं नेपाली जनताका छोराछोरीले रगत बगाएको स्मरण गराए।
नेपाली कांग्रेसका नेता गिरिजाप्रसाद कोइराला र आफूले हस्ताक्षर गरेको शान्ति सम्झौतापछि मुलुकमा संघीयताको ढोका खुलेको उनले बताए। ‘मुलक संकटमा परे त्यो शान्ति सम्झौतामा हस्ताक्षर गरेको नाताले देश र संविधानको रक्षा मैले गर्नुपर्छ,’ उनले भने।