काठमाडौं । एक वर्षयता बलिउड अभिनेत्री ज्याकलिन फर्नान्डिज सुकेश चन्द्रशेखरको गैरकानुनी गतिविधिमा संलग्न भएको आरोपका कारण तनावमा छिन् । सुकेशले गरेको मुद्राको अवैध ओसारपसार (मनी लाउन्ड्रिङ) र जबर्जस्ती असुलीको गतिविधिमा ज्याकलिनको पनि नाम जोडिएको छ ।
२०० करोड भारुको यो मनी लाउन्ड्रिङ मुद्दामा ज्याकलिनको मुस्किल अझै बढ्ने अनुमान गरिएको छ । बलिउड मिडियाका अनुसार प्रवर्तन निर्देशनालय (ईडी)ले ज्याकलिनलाई नामै लिइएको तयार पारिएको आरोपपत्र अदालतमा दायर हुँदैछ ।
गत अप्रिलमा ईडीले अभिनेत्री फर्नान्डिजसँग रहेको ७ करोडभन्दा बढी सम्पत्ति गैरकानुनी रुपमा आर्जन रहेको बताएको थियो । ईडीले तयार पारेको आरोपपत्रमा ज्याकलिनलाई अभियुक्त मानिएको छ ।
ईडीका अनुसार चन्द्रशेखरले ५२ लाख मूल्य पर्ने घोडा र ९ लाख भारु पर्ने पर्सियन बिरालोसहित ५.७० करोड भारुको उपहार ज्याकलिनलाई दिएका थिए । यसबाहेक उनले ज्याकलिनको परिवारलाई पैसा र अन्य उपहार दिएको पनि जनाइएको छ ।
चन्द्रशेखर र ज्याकलिन दुवै रिलेसनसिपमा रहेको बताइएको छ । यसअघि यी दुवैको अन्तरंग तस्वीर सामाजिक सञ्जालमा सेयर भएका थिए । यसपछि ईडीले यी तस्वीरलाई प्रमाणको रुपमा पेश गरेको छ ।