८ मंसिर, काठमाडौं । प्रतिनिधि सभा सदस्यका उम्मेदवार रन्जु न्यौपाने (दर्शना)को जमानत जफत भएको छ ।
विवेकशील साझा पार्टीबाट सक्रिय रुपमा राजनीतिमा होमिएकी रन्जुले यसपटक काठमाडौं क्षेत्र नम्बर ५ बाट प्रतिनिधि सभा सदस्यमा स्वतन्त्र उम्मेदवारी दिएकी थिइन् । तर, कुल खसेको सदर मतको जम्मा १.४ प्रतिशत मत मात्रै प्राप्त गर्न सकिन् । यस क्षेत्रको सदर मत ४४ हजार २४९ छ । यसमा रन्जुले ६०० मत प्राप्त गरेकी हुन् ।
उनी २०७४ को स्थानीय निर्वाचनबाट चर्चामा आएकी हुन् । उक्त निर्वाचनमा उनले विवेकशील साझा पार्टीबाट काठमाडौं महानगरपालिकाको मेयरमा उम्मेदवारी दिएकी थिइन् । त्यसबेला उनले २३ हजार ४३९ मत ल्याएकी थिइन् ।
यसपटक प्रतिनिधि सभा सदस्यमा उठ्दा निकै कम मत प्राप्त गरेकी हुन् । निर्वाचनमा भएको मतदानमा खसेको कुल सदर मतको १० प्रतिशत नपुग्ने उम्मेदवारको जमानत जफत हुने कानुनी व्यवस्था छ ।
कानुन अनुसार प्रतिनिधि सभातर्फका उम्मेदवारले मनोनयन दर्ता गर्दा धरौटीबापत रकम १० हजार जम्मा गर्नुपर्ने हुन्छ । कुल सदर मतको १० प्रतिशत नपुग्ने उम्मेदवारको धरौटीबापत रकम फिर्ता हुँदैन ।
यस क्षेत्रबाट प्रतिनिधि सभा सदस्यमा निर्वाचित कांग्रेसका प्रदीप पौडेलले ३४.४ अर्थात, १५ हजार २५७ मत प्राप्त गरेका छन् ।
यो पनि :-
काठमाडौँ । नेकपा माओवादी केन्द्रको भ्रातृ संगठन वाइसिएलका इन्चार्ज रामप्रसाद सापकोटा दिपशिखाले नेपाली कांग्रेसका महामन्त्री गगन थापाले घन्टीसँग मिलेर गठबन्धनलाई हराएको आरोप लगाएका छन् ।
आज बिहान फेसबुकमा लेख्दै दिपशिखाले गगन र उनको टिमले राष्ट्रिय स्वतन्त्र पार्टी (घन्टी) सँग मिलेर गठबन्धनका सहयात्रीहरूलाई हराएको आरोप लगाएका हुन् । ‘नेपाली कांग्रेसका नेता मित्र गगन थापाले खगेन्द्र संग्रौलामाथि लेखिएको उज्जवल प्रसाईको पुस्तक विमोचनले भनेका थिए–म कालो कांग्रेस हुँ ।
हो रहेछ, तपाईं र तपाईंको टिमले घण्टीसँगको साझेदारीमा हामी गठबन्धनका सहयात्रीहरुलाई मज्जाले हराउनुभयो,’ उनले भनेका छन्, ‘तपाईलाई आगामी यात्राको शुभकामना ।’ उनले अहिले आइरहेका परिणामलाई स्वीकार गर्ने पनि बताएका छन् । ‘हामी जनमतको उच्च कदर गर्दै परिणामलाई सहर्ष स्वीकार गर्छौ, तर यति कुरा दर्ज गरिराख्नपर्ने भएर लेखियो,’ उनले भनेका छन् ।
सत्ता गठबन्धनको भागबन्डामा काठमाडौँ जिल्लाका १० सिटमध्ये तीन सिट पाएको माओवादी केन्द्रले निर्वाचनमा यस जिल्लामा ५ जना उम्मेदवारहरू खडा गरेकोमा सबै उम्मेदवारहरू पराजित हुन पुगेका छन् । २०७४ को सङ्घीय निर्वाचनमा बाम गठबन्धनमा चार सिट पाउँदासमेत एक सिट पनि जित्न नसकेको माओवादी केन्द्र अहिले पनि काठमाडौँमा निल भएको छ ।
गठबन्धनको भागबन्डामा तीन सिटमा तीन जना महिला उम्मेदवारलाई अगाडि सारेको यस पार्टीले जित निकाल्न सकेनन् । पूर्व सभामुख समेत रहेकी ओनसरी घर्तीलाई सत्ता गठबन्धनको तर्फबाट माओवादी केन्द्रबाट टिकट लिएर काठमाडौँ क्षेत्र नम्बर २ को उम्मेदवार बनाइएको थियो ।
निर्वाचनको अन्तिम नतिजा आउँदा यस क्षेत्रबाट राष्ट्रिय स्वतन्त्र पार्टीकी सोविता गौतम १४ हजार २२९ मतका साथ निर्वाचित हुँदा घर्ती ९ हजार ४४९ मतका साथ तेस्रो स्थानमा रहन पुगिन् । चुनावी प्रचारप्रसारको क्रममा प्रचण्डले ओनसरी प्रधानमन्त्री हुन सक्ने व्यक्ति भएको समेत बताएका थिए ।
यो पनि पढ्नुहोस् :
काठमाडौँ – काभ्रेको निर्वाचन क्षेत्र २ मा नेकपा एमालेका नेता गोकुल बास्कोटाले अग्रता बनाएका छन् ।
पछिल्लो मतपरिणाम अनुसार एमालेका बास्कोटाले १७ हजार ५२ मत प्राप्त गरेका छन् ।
भने उनलाई पछ्याईरहेको नेपाली काँग्रेसका शिव हुमगाईले १६ हजार सात सय ७६ मत प्राप्त गरेका छन् ।
यो पनि पढ्नुहोस् :
भक्तपुर क्षेत्र नम्बर २ मा कांग्रेस उम्मेदवार दुर्लभ थापा विजयी भएका छन्।
उनले २२२४८ मत प्राप्त गरेका छन् भने उनका निकटतम प्रतिद्वन्द्वी एमालेका उम्मेदवार महेश बस्नेतले २१६४३ मत ल्याएको निर्वाचन आयोगले जनाएको छ
वीराटनगर – कांग्रेस महामन्त्री विश्वप्रकाश शर्मा झापा १ बाट निर्वाचित भएका छन्।
पछिल्ला तीन निर्वाचन मध्ये दुई वटामा पराजित भएका शर्मा एमालेका अग्नि खरेललाई १४ हजार भन्दा बढी मतले पराजित गरेका हुन्।