एजेन्सी । विश्वकप फुटबलको २२औँ संस्करण फाइलन खेल आज हुँदैछ । उपाधि भिडन्तका लागि साविक विजेता फ्रान्स र अर्जेन्टिना मैदान उत्रदै छन् । नेपाली समयानुसार आज राति ८ः४५ बजेबाट खेल सुरु हुनेछ ।
विश्वकपको आज अन्तिम दिन भएकाले फुटबल फ्यानहरुले आफ्नो टीमलाई समर्थन गर्न व्यस्त देखिन्छन् । यसैबीच चर्चित हास्यकलाकार तथा निर्माता दीपकराज गिरीले पनि अर्जेन्टिनालाई समर्थन जनाउँदै आफ्नो सामाजिक सञ्जालमा स्टाट्स शेयर गरेका छन् ।
उनले सन् १९९० बाट आफूले फुटबल हेर्न सुरु गरेको लेखेका छन् । म्याराडोनाको खेल हेर्न थालेपछि अर्जेन्टिना मन पर्न थालेको उनको भनाइ छ ।
उनी लेख्छन, ‘म्याराडोना र उनको जादुको बारेमा सुनेकोमात्र थिएँ । टेलिभिजनमा हेरेपछि उनी र अर्जेन्टिना मन पर्न थाल्यो । त्यसपछि पिरती गाँसिए झैं भयो । बाटिस्टुटा, ओर्टेगा, कार्लोस टेभेज जस्ता प्रिय खेलाडीहरूका कारण मन अर्जेन्टिनामै रहिरह्यो । लगातार सपोर्ट गर्न छाडिएन ।’
उनले स्टाट्समा मेस्सीलाई जादुगर बताएका छन् । मेस्सीको फुटबल खेल्ने शैलीमात्र नभई उनको व्यक्तित्वले समेत आफूलाई आकर्षित गरेको दीपक बताउँछन् ।
फ्रान्स बलियो टीम भए पनि फुटबलप्रेमी र मेस्सीको जीत हेर्ने रहर भएकाले यसपालिको विश्वकप मेस्सीको नाममा हुनुपर्ने कुरा उनले स्टाट्समा उल्लेख गरेका छन् ।
